Trafico Sigur

E EFECTO Y CONSECUENCIANAN DI CORE BAO DI INFLUENCIA DI ALCOHOL

• Alcohol ta reduci e funcion di bo celebro, afectando pensamento, rasonamento y coordinacion di musculonan. Tur e habilidadnan aki ta esencial pa maneha un vehiculo cu siguridad.
• Mas e cantidad di nivel di alcohol eleva den curpa di un persona, mas e efectonan negativo riba su sistema nervioso central ta aumenta.
• E ta reduci (slowdown) bo abilidad pa reacciona
• Ta bira dificil pa controlá bo auto riba caminda, bo ta cuminsa “Zig Zag” poniendo bo mes y otronan den peliger.
• Bo bista ta perde bon visibilidad y bo no por mira bon señalnan, peaton of otro vehiculo su movecion.
• Bo por cay soño tras di stuur.

Aki na Aruba pa siman por nota un cantidad grandi di caso nan di incidentenan y accidentenan den trafico cu ta wordo ocasiona pa core bao di influencia di Alcohol.

Como procedura y manera ley ta stipula, e conductor cu ta sospecha di core bao influencia di Alcohol, lo mester mester haci un alcohol test, cual aki na Aruba ta tuma lugar primeramente pa medio di un ‘Breathalyzer’ (via rosea). E sospechoso mester supla y e resultado no mag di pasa 220 ug/l pa rosea supla.

Den cierto caso tambe por test e nivel di Alcohol door di haci un test di sanger. E resultado no por surpasa 0.5 mg per 100ml di sanger. Si wordo comproba cu bo persona ta surpasa e limite di Alcohol, bo por haya un multa di maximo Awg. 25.000,- of un sentencia di maximo 2 aña.

E opcion mas sigur ta scoge pa keda sin consumi alcohol si ta bay core auto. Hasta un cantidad minimo por afecta bo habilidad pa maneha un auto. Tampoco tin un manera sigur cu bo por constata of controla cu bo ta den limite di alcohol legal.

Si bo tin planes pa bebe, busca bo Amigo Didi.