Trafico Sigur

Oranjestad, 25 di Maart 2024 – Siguridad pa nos muchanan riba caminda ta crucial, pesey Comision Trafico Sigur ta desea pa pone enfasis riba e importancia di e uzo corecto di Child Car Seat. Ta sumamente vital pa subraya e importancia di uza e Child Car Seat apropia pa e edad di e mucha y cu e ta wordo instala corectamente den e auto pa proteha e muchanan.

Segun estadisticanan internacional accidentenan di auto ta un di e principal causanan di morto pa muchanan. Sinembargo, hopi di e fatalidad y lesionnan serio aki por wordo preveni pa medio di e uzo corecto di Child Car Seat ta indica cu e por reduci e riesgo di morto den auto di pasahero te cu 71% pa baby y te cu 54% pa muchanan di 1-4 aña di edad (NHTSA).

Un Child Car Seat ta diseña pa brinda proteccion den caso di accidente na muchanan, cu nan curpa no ta suficientemente grandi ainda pa bisti un seatbelt. E ta distribui e forsa of shock di un accidente for di e partinan mas fuerte di nan curpa y ta minimalisa e riesgo di lesionnan serio. Sinembargo, ta importante pa sigura cu un Child Car Seat mester wordo instala y uza corectamente pa maximalisa nan efectividad.

Comision di Trafico Sigur ta urgi mayornan y esnan cu ta cuida mucha pa sigui e siguiente consehonan:
Scoge un Child Car Seat adecua: scoge un cu ta apropia pa e mucha su edad, peso y haltura. Sigura cu e Child Car Seat ta cumpli cu of ta supera e standard di siguridad estableci.

Instala e Child Car Seat corectamente: Sigui instrucciononnan di e fabricante y e manual di e auto pa e instalacion bay corecto. Sigura cu e Child Car Seat ta wordo instala hopi firme, cu menos movecion posibel.

E fahanan di asiento: Uza e fahanan pa sigura cu e mucha ta mara firmemente den e Child Car Seat, cu e clip di e fahanan ta ser posiciona na nivel di su schouder.

Mantene e muchanan mirando patras segun e ta crece te mas largo tempo posibel, te ora cu nan yega na e peso of limite di altura maximo cu ta specifica pa e fabricante riba e label di instruccion.

Uza un Booster Seat pa mucha cu a crece: Ora e mucha crece fuera di e limitenan di peso of haltura di e Child Car Seat, ta importante pa tranferi nan pa un asiento corecto di ‘Booster’ pa sigui cuidanan cu maximo siguridad den auto. E Booster Seat ta yuda pa eleva e mucha pa asina e sinta na altura cu e por uza e seat belt di e auto pa reforsa e firmesa di e stoel, pues menos movecion.

Uzo di seat belt: For di momento cu e mucha ya a crece y cu e faha ta pasa riba su pecho y cintura, por sigui uza e seat belt sinta patras. Segun Ley di Trafico di Aruba, ta obligatorio pa muchanan bou di 12 aña sinta patras bisti nan seat belt (Art. 45 lid 3 Landsbesluit Verkeersregel AB 1999 no. 39.)

Registra bo asiento: completa e registracion cu ta bin cu e Child Car Seat pa asina bo por ricibi actualisacion importante di siguridad di bo asiento di e fabrica.

Comision Trafico Sigur ta na altura cu hopi mucha ta wordo transporta den autonan aki na Aruba, specialmente mainta ora di hiba muchanan creche of speelschool. Pesey mes a cuminsa cu e campaña di informacion y promocion pa brinda comunidad mas informacion posibel pa cuida nos muchanan. Comision Trafico Sigur tambe ta consciente cu un Car Child Seat tin su costo y no ta accesibel pa tur famia. Pa famianan cu tin dificultad pa yega na un Child Car Seat por tuma contacto cu Wit Gele Kruis na 5948045 of 5949931. Bo Yiu ta bo responsabilidad; Ban Cuide!

Salba Bida y Scoge pa Siguridad.

Nota: imagen ilustra ta basa riba estimacion di edad, cambio di child seat y booster seat ta depende di cada mucha su haltura y peso.